சரியைநீ சரியாகச் சொல்கின்ற மனிதனெனில்
சரியாக நடக்கின்ற சரியான மனிதன்நீ!
சரியைநீ சரிபோலச் சொல்பவனாய் இருந்தனையேல்
சரியாகச் சரிபுரியா தடுமாறி எனக் கொள்வேன்
பிழையைநீ சரிபோல உருமாற்றி உரைக்க வந்தால்
பிழைசார்ந்து சரிஏயக்க வருகின்ற நரியன்நீ!
பிழையைநீ பிழைதானென பயமின்றி முன்எடுத்தால்
பிழைவிழையா தரம்கொண்ட தலைமகனாய் நான்கொள்வேன்
தரம்இல்லா சொற்களைநீ உன்பேச்சில் முன்வைத்தால்
தரம்கெட்டக் குளத்தினின்று தவளைதுப்பும் படமுணர்வேன்
தரமானபேச்சுடனே தரமான நடத்தையுமேல்
தரமான மனிதன்நீ எனஉன்னை மதித்திடுவேன்
பலமிருக்கும் திமிரினிலே தரமிழக்கும் மனிதனெனில்
சலம்வழியும் புண்நக்கும் சொறிநாயாய் இனங்காண்பேன்
பலவழியும் மனங்கவரும் சரிவழிநில் நேர்மையனேல்
பலவிதமும் வழிகாட்டும் தரம்மிக்கோன் என மதிப்பேன்
கருத்துகள் இல்லை:
கருத்துரையிடுக